Mëngjesin e sotëm në aksin rrugor Lushnjë-Fier, në vendin e quajtur Kolonjë u gjet i pajetë brenda makinës Betim Kastrati 38-vjeç. Sipas policisë kishte vrarë veten me armë zjarri.
Kastrati ishte banues në qytetin e Durrësit dhe punonjës në port, ndërsa kohët e fundit sipas familjarëve kishte shfaqur shenja të depresionit.
38-vjeçari ishte i martuar dhe kishte 2 fëmijë të mitur, ndërkohë që u gjet i pajetë në mjetin e tij tip Volvo, i cili ishte parkuar në mënyrë të rregullt anës rrugës.
38-vjeçari kishte ushtruar dhunë në familje. Bashkëshortja e tij ishte me urdhër mbrojtje dhe prej disa kohësh 38-vjeçari nuk lejohej t’i afrohej.
Fillimisht ngjarja u hetua për ndonjë vrasje të mundshme, por sipas policisë, Kastrati kishte vrarë veten, në kushtet e depresionit.
Mesazhet ngushëlluese kanë qenë të shumta nga miqtë dhe të afërmit që janë tronditur nga lajmi i papritur për humbjen e njeriut të tyre të dashur.
