Orlando Petkola i shpëtoi për mrekulli një atentati me armë zjarri mesditën e sotme në Shijak.
Djali i një efektivi në burgje, ishte duke udhëtuar me një kamionçinë me bombola oksigjeni në një rrugë dytësore Xhafzotaj –Shijak kur rreth orës 12:10 drejt tij u qëllua me armë zjarri nga një makinë tip “Golf”.
Si pasojë e të shtënave nuk ka persona të lënduar. Drejtuesi i kamionçinës, që ishte shënjestra e atentatit humbi kontrollin mbi drejtimin e mjetit dhe për pasojë mjeti doli nga rruga, por pa pësuar dëmtime fizike drejtuesi i mjetit.
Ende nuk dihet asgjë mbi autorët dhe motivet nëse kanë lidhje me detyrën e të atit apo ndonjë konflikt me punën e djalit të policit.
Shërbimet e policisë kanë shkuar në vendngjarje, kanë ngritur pika kontrolli në të gjitha rrugët kryesore e dytësore, si dhe kanë rrethuar zonën. Vijon krehja e saj për kapjen e autorëve.
Grupi hetimor ndodhet në vendngjarje dhe nën drejtimin e Prokurorisë vijon puna për zbardhjen e rrethanave të ngjarjes, si dhe për identifikimin e autorëve.
