Ish-deputeti socialist, Alqi Bllako, i arrestuar nga SPAK për inceneratorin e Fierit kërkon të lirohet nga qelia. Përmes avokatit Sokol Hazizaj, Bllako ka ankimuar në Apelin e Posaçëm masën e sigurisë “arrest në burg”, të caktuar nga Shkalla e Parë për akuzën e “shpërdorimit të detyrës” dhe “korrupsionit”.
Ish-deputeti pretendon se nuk ekziston dyshimi i arsyeshëm për kryerjen e veprave penale dhe nuk ekzistojnë kushtet ligjore për një masë ekstreme si ajo e “arrestit në burg”.
Alqi Bllako që u arrestua pak ditë më parë. Konkretisht ai akuzohet se ka marrë përfitime të paligjshme nga kompanitë koncensionare të ndërtimit të inceneratorëve, ndërsa ka favorizuar këto kompani gjatë kohës që ushtronte detyrat shtetërore si sekretar i përgjithshëm i Ministrisë së Mjedisit dhe më pas në funksionin e “Autoritetit Kontraktues” si drejtor i Agjencisë Kombëtare të Ujësjellës Kanalizimeve dhe Infrastrukturës së Mbetjeve.
Bllako akuzohet për falsifikimin e të dhënave për tokën mbi të cilën është ndërtuar inceneratori i Fierit duke i ndryshuar kartelën nga “tokë arë” në “tokë truall” gjë që ka çuar në një rritje të kostos së shpronësimit me 16 milionë lekë.
