Grupi i PD-së është i ndarë lidhur me qëndrimin që duhet të mbajë partia më e madhe në opozitë për Presidentin e ri. E ndërsa Berisha e kundërshton pjesëmarrjen, Enkelejd Alibeaj dhe të tjerë janë pro pjesëmarrjes në konsultime. Deputeti Dashnor Sula kërkoi që opozita të bëjë propozimin e saj.
“Unë nuk jam për të bojkotuar proceset. Është treguar se ne nuk kemi fituar asgjë nga bojkotet. Bojkotuam në 2014 Reformën Territoriale dhe e pamë sesi e bëri Rama. Më pas bëtë çmendurinë kolektive që dogjët mandatet dhe sërish e patë se si përfunduam si opozitë.
Bëmë sërish çmendurinë me zgjedhjet lokale dhe sërish u penalizuam. E pamë në 6 mars sa e vështirë është. Ne nuk përfitojmë asgjë nga bojkotet e proceseve. Çfarë na pengon neve deputetët e opozitë që me 28 firma të çojmë propozimin tonë në kuvend. Pastaj le ti mbesë mazhorancës turpi i zgjedhjes.
Tani thoni që presidenti është pa kompetenca dhe Rama e zgjedh vet se i ka votat. Po ishte marrëveshja e 21 prill 2008 që e bëri presidentin pa kompetenca që unë së bashku me disa kolegë në atë kohë votuan kundër kësaj”, ka thënë ai.
