Partia Demokratike e Kosovës do të dorëzojë sot kallëzim penal ndaj anëtarëve të Bordit të Zyrës së Rregullatorit për Energji (ZRRE), për tarifat e shtrenjta.
Përmes një njoftimi drejtuar mediave, kallëzimi penal ndaj tyre do të dorëzohet për mos zbatim të aktvendimit të Gjykatës Themelore në Prishtinë, për shtyrjen, përkatësisht pezullimin e zbatimit të vendimit për këto tarifa.
Zyra e Rregullatorit për Energji duket se nuk ka në plan të pezullojë tarifat e shtrenjta, as pas vendimit të Gjykatës Themelore në Prishtinë. Nga ky institucion e kanë konfirmuar se e kanë pranuar aktvendimin e Themelores, teksa kanë paralajmëruar ankesë në Gjykatën e Apelit.
Petrit Pepaj nga ZRRE tha se ky institucion do të parashtrojë ankesë për këtë vendim brenda afatit ligjor në Apel.
“ZRRE-ja, ka pranuar aktvendimin e gjykatës dhe mbështetur në dispozitat ligjore të nenit 23 par. 2 Nenin 49 par. 1 dhe 2 lidhur me Nenin 63 të LKA-së, lidhur me Nenin 176 të Ligjit për Procedurën Kontestimore (Ligjin Nr. 03/L – 006), do të parashtrojë ankesë brenda afatit ligjor pranë Gjykatës së Apelit”, ka thënë Pepaj.
