Një luftë bërthamore “është e papranueshme për Rusinë”. Kështu tha ministri i jashtëm rus Sergei Lavrov, duke shtuar se Moska synon të vazhdojë negociatat e paqes me Ukrainën. “Vullneti i mirë ka kufijtë e tij. Dhe nëse nuk është reciproke, kjo nuk do të kontribuojë në procesin diplomatik, por ne do të vazhdojmë të ndjekim negociatat me delegacionin e Zelensky”.
Pas kësaj deklarate për luftë të tretë botërore, ka ardhur reagimi i Ukrainës. “Kërcënimi i Moskës për rrezikun e një lufte të tretë botërore tregon se Rusia po e kupton se do të humbasë”. Ministri i Jashtëm ukrainas Dmytro Kuleba është i bindur për këtë dhe shkruan në rrjetet sociale se Moska “humb shpresën e fundit për të frikësuar botën në mbështetjen e Ukrainës. Prandaj bëhet ligjërimi i një rreziku ‘real’ të Luftës së Tretë Botërore. Kjo do të thotë vetëm se Moska ndjen humbje në Ukrainë. Prandaj bota duhet të dyfishojë mbështetjen e saj për Ukrainën në mënyrë që të mbizotërojë dhe të ruajë sigurinë evropiane dhe globale.”
Ka reaguar edhe Presidenti Zelensky. Në botë, “të gjithë, madje edhe ata që nuk na mbështesin hapur” bien dakord se “është në Ukrainë që vendoset fati i Evropës, fati i sigurisë globale, fati i sistemit demokratik”. Presidenti ukrainas Volodymyr Zelensky e tha këtë në fjalimin e tij të fundit, duke nënvizuar se Rusia gjithashtu mund të “shpenzojë burime të mëdha për të mbështetur luftën”, ajo gjithashtu mund “të kundërshtojë të gjithë botën e lirë”. Por “mësimet e historisë janë të njohura. Nëse keni ndërmend të ndërtoni një Rajh mijëvjeçar, ju humbni. Nëse keni ndërmend të shkatërroni fqinjët, ju humbni. Nëse doni të rivendosni perandorinë e vjetër, ju humbni”.
