Shtetet e Bashkuara të Amerikës kanë reaguar pas shpërthimeve të ndodhura së fundmi në Transnistria, rajonin separatist të mbështetur nga Rusia në territorin e Moldavisë. Zëdhënësi i Pentagonit, Ned Price, u shpreh se SHBA-të po monitorojnë nga afër dhe me kujdes situatën e fundit të krijuar në këtë rajon.
“Ne përsërisim thirrjen e qeverisë moldave për qetësi si përgjigje ndaj këtyre incidenteve dhe mbështesim plotësisht integritetin territorial dhe sovranitetin e Moldavisë. Ne respektojmë neutralitetin e saj të garantuar me kushtetutë”, tha ai në një konferencë të Departamentit të Shtetit.
“Ne nuk i dimë të gjitha detajet përveç asaj që ndodhi dje, por ne mbetemi të shqetësuar për çdo përpjekje për të përshkallëzuar tensionet,” shtoi ai. Moldavia ka mbledhur Këshillin e Sigurisë Kombëtare menjëherë pas sulmeve të fundit ku u shkatërruar edhe antenat e transmetimit të radios.
Ndërkohë, Presidenti ukrainas Volodymyr Zelensky tha se Rusia po përpiqet të destabilizojë rajonin përmes aktivitetit ushtarak në rajonin separatist të Moldavisë.
“Ky është vetëm një nga hapat e Federatës Ruse. Kjo po ndodh për të destabilizuar rajonin dhe për të kërcënuar Moldavinë”, tha Zelensky i pyetur nga një gazetar gjatë një konference të përbashkët shtypi në Kiev me drejtorin e përgjithshëm të IAEA Rafael Mariano Grossi të martën.
