Akuza dhe tymnajë brenda opozitës. Sekretari i përgjithshëm i PD-së, Gazment Bardhi shtroi sot një pyetje në rrjetet sociale për atë që quan me ironi “opozitë e vërtetë”, duke pretenduar se Edi Rama i mban peng për shkak se i ka zbuluar një vilë të pajustifikuar me vlerë 760 mijë euro.
“Pyetje për “opozitën e vërtetë”; vilën 760 mijë euro, e shitën apo spo ja ble askush ????? Nuk mund të mbash peng opozitën për një vilë të pajustifikuar që të ka zbuluar dhe me të cilën të mban peng Edi Rama!!!” shkroi Bardhi.
Deputeti demokrat nuk dha emër kujt i drejtohet, por duket se bëhet fjalë për një politikan të rëndësishëm.
Gjatë ditës së sotme deklarata në emër të Komisionit të Rithemelimit kanë bërë kryetari i këshillit kombëtar të PD-së, Edi Paloka, zëdhënësja e grupit të Rithemelimit Floriana Garo dhe Eno Bozdo.
Gjithashtu sot reagoi edhe Ervin Salianji, kundër draftit të Enkelejd Alibeajt për Presidentin e ri por që nuk është pjesë e grupit të Rithemelimit.
Megjithatë nuk dihet se kujt i referohet Bardhi.
