Ish-kryeministri Sali Berisha që pas dy ditësh do të “çimentojë” postin e kryetarit të PD-së, i është përgjigjur deputetit kristiandemokrat në Parlamentin Gjerman, Gunther Krichbaum, i cili paralajmëroi se nëse lideri historik i së djathtës do të marrë drejtimin e partisë më të madhe në opozitë do të kërkojë pezullimin e saj nga PPE, partitë Popullore Europiane. Berisha tha se ndjen keqardhje dhe i bëri një sugjerim.
“Shumë thjeshtë. Ai ishte angazhim personal. Unë në qëndrimet personale, të individëve nuk ndërhyj, por cili është komenti im? Keqardhje, që një deputet i Bundestagut, i CDU-së, mendon që mund të ndërhyjë në një proces të lirë, te një parti simotër dhe aq më tepër kur e bën bazuar në një vendim të faktuar se është marrë nga lobimi korruptiv i Soros-Rama. E ftoj që të ndërmarrë një hetim, në të gjitha arkivat e vendit të tij, nëse mund të gjejë një provë për të faktuar atë shpifje të mafies së Soros” tha ai.
