Dita e premte do të vendosë shumë. Së pari emrin e kreut të ri të shtetit. Kreu i PS-së, Edi Rama ndodhet në SHBA dhe pritet që të kthehet të premten paradite.
Në orën 17:00 ka njoftuar mbledhjen e kryesisë për të vendosur emrin e pasuesit të Ilir Metës.
Në tryezën e tij janë disa emra. Dëshira është për një zonjë. Por fjalën e fundit do ta thotë të premten se cilin emër do të çojë të shtunën pasdite në 18:00 për votim në Kuvend.
Por zhvillime ka edhe në krahun tjetër. Sali Berisha, tashmë i zgjedhur në krye të PD-së do të plotësojë kupolën drejtuese me sekretarin e përgjithshëm dhe dy n/ kryetarët.
Dy emrat që pritet që të garojnë për sekretar të përgjithshëm për të fituar besimin e Këshillit Kombëtar do të jenë Flamur Noka dhe Belind Këlliçi.
Luçiano Boçi pritet të sfidojë Oerd Bylykbashin për postin e n/kryetarit, ndërsa ende nuk dihet se cilat do të jenë dy gratë që do të kërkojnë të kenë një pozicion të rëndësishëm në kupolën drejtues të bluve të udhëhequr nga Berisha.
Çfarë do që të ndodhë të premten, një gjë është e sigurt; qejfmbetje ka për të pasur, sidomos në kampin opozitar.
