Policia italiane ka arrestuar një 44-vjeçar si autor të dyshuar të vrasjes së shqiptares Nevila Pjetri në orët e para të mëngjesit të së dielës në Itali.
44-vjeçari dyshohet se është autor edhe i një vrasje tjetër të ndodhur pothuajse në të njëjtën zonë.
Bëhet fjalë për një viktimë të dytë, një transgjinor italian, trupi i të cilit ishte gjetur pranë vendit ku u gjet edhe trupi i pajetë i 35-vjeçares Nevila Pjetri.
Mediat italiane raportonin e shqiptarja ishte një punonjëse seksi, por bashkëshorti i saj, Leonard Marku kopshtar u shpreh i tronditur.
“Ndihem sikur po jetoj në një film, sepse vetëm në kinema shikon dhe dëgjon histori të tmerrshme si kjo. Që kur e kam njohur, nuk kam dyshuar kurrë për diçka të tillë.
Ajo ishte grua shembullore, dashuria ime. Për fat të keq, ka vdekur. Unë do të bëj gjithçka që është e mundur për të gjetur këdo që e ka larguar nga unë.
Ai/ajo do të paguajë për të. E prita gjithë mbrëmjen dhe nuk e kuptova pse nuk u kthye. Punonte në një kamping, nuk e di saktësisht se në cilin, afër La Spezia-s.
E kam zemrën e thyer. Nuk mund të fle më, kam ndejtur të gjithë natën zgjuar për të kuptuar cfarë ndodhi. Nuk arrij të kuptoj kush mund të ketë qenë.
Betohem se po bie në depresion. Unë jam shkatërruar”, tha Marku për mediat italiane.
