Nga Enver Robelli
Tirana është i vetmi kryeqytet në Europë ku kryetari i saj pranon të vendoset një pllakë përkujtimore për “shehidët e Erdoanit”, të vrarë pas përpjekjes për puç në Turqi më 2016. Këtë pllakë shpesh e ruan policia në Tiranë.
Pa pasur fare nevojë, Tirana shndërrohet në arenë të konflikteve të brendshme turke. Dënimi i tentimit për puç mjafton. Më shumë s’ka nevojë asnjë shtet të përzihet në tifozeri për Erdoanin, as për ndonjë palë tjetër.
Por kjo nuk i mjafton udhëheqjes së Tiranës, andaj i imiton qytetet turke si Gaziantepin dhe Shanliurfën. Pastaj: në Tiranë Erdoani ka ndërtuar tashmë xhaminë më të madhe në Ballkan.
Kësisoj kjo xhami e ka lënë nën hije xhaminë e Mbretit Fahd në Sarajevë, e cila konsiderohej si më e madhja në Ballkan.
Kaq sa i përket tendencave propagandistike nga Tirana lidhur me ndërtimin e xhamisë në Prishtinë (ndonëse personalisht kam qenë adhurues i një projekti tjetër, modern, dhe jo i këtij projekti).
Si vendet e tjera të rajonit edhe Kosova ka pasur probleme me ekstremistë në kontekst të luftës në Siri. Veprimet e autoriteteve kundër kësaj strukture kanë qenë energjike.
Por hiç më mirë nuk qëndron as Shqipëria sa i përket ekstremistëve fetarë. Keni parë ndonjë kryeministër europian që fluturon në Liban për t’i marrë shtetasit shqiptarë të mbetur nëpër kampe pas disfatës së ISIS-it? Kështu që secili le ta pastrojë oborrin e vet, pa propagandë kundër Kosovës.
