Ish-kryeministri Sali Berisha ka dënuar gjuhën e përdorur nga Edi Rama kundër Bullgarisë që bllokoi negociatat. Kryetari i PD-së në emër të opozitës i kërkoi ndjesë Bullgarisë për retorikën e kryeministrit të Shqipërisë.
“Skandaloze ishin deklaratat e Edi Ramës. A e dëgjuat të përmendte Shqipërinë?! Vetëm avokatinë e Serbisë. Kritikonte liderët europianë përse i kërkojnë Serbisë të zbatojë sanksionet për Rusinë. Qortoi dhe përdori fjalë fyese për lidershipin e BE-së. Ky shkoi jo për të mbrojtur interesat tona, por të vasalit të Serbisë.
Një skandal shumë i rëndë ishte edhe sulmi që i bëri Bullgarisë. Turpi të mbulojë Edi Ramën, që i jep një vendi mik, në publik, turpin si një odiner. Bullgaria është një vend mik. Në emër të opozitës shqiptare, të PD-së i kërkoj ndjesë popullit bullgar.
Ky nuk është mendimi i shqiptarëve, por një aventurieri, që nuk e di se cfarë është miqësia. Edi Rama është një i përdalë në rrafshin politik dhe diplomatik” tha Berisha.
