Presidenti i Republikës së Shqipërisë Ilir Meta, ka postuar në median sociale Facebook takimin e tij me Kryetarin e Kuvendit të Kosovës, Glauk Konjufca. Meta e ka konsideruar Kosovën si faktor të rëndësishëm në rajon dhe se Shqipëria duhet të marrë shembull.
“Kënaqësi të ndaja vlerësimet për përparimin e gjithanshëm të Kosovës, që gjithmonë e më shumë po konsolidohet si faktor paqeje, sigurie, stabiliteti, demokratizimi dhe evropianizimi në rajon”.
Presidenti Meta shkruan se Kosova “ka hedhur themele të forta e të qëndrueshme të shtetndërtimit” duke “duke përqafuar vlerat dhe parimet më të larta demokratike, respektin për liritë, të drejtat dhe dinjitetin njerëzor, mbrojtjen më sipërore të pakicave”.
Shteti i Kosovës, vijon Kreu shqiptar i shtetit, ka treguar përkushtim në funksionimin e demokracisë parlamentare, respekton parimet e kontrollit dhe balancës së pushteteve dhe synon sundimin e ligjit dhe luftën kundër korrupsionit.
“Shqipëria duhet të marrë shembull nga ushtrimi i demokracisë në Kosovë, në veçanti se si llogaridhënia qeverisëse sigurohet përmes institucionit më jetik të demokracisë përfaqësuese, që janë zgjedhjet e lira dhe të ndershme”, nënvizon Presidenti Meta.
Meta bëri thirr se për liberalizimin e vizave për qytetarët e Kosovës si një “domosdoshmëri që duhet të ndodhë sa më parë”.
