Në orën 19:35 kryetarja e Gjykatës Kushtetuese, Vitore Tusha i dorëzoi librin themeltar të shtetit Presidentit të ri të Republikës, Bajram Begaj. Kreu i ri i shtetit u shpreh se do të punojë në mandatin e tij për dialog mes forcave politike. Ai kërkoi vazhdimin e reformës në drejtësi për të goditur krimin dhe korrupsionin.
“Dialogu dhe bashkëpunimi mes forcave politike, shoqërisë civile, komuniteteve fetare, dëgjimi i medias së lirë dhe pranimi i debatit mundëson që forca e tij të mishërohet në mirëqenie për qytetarët. E ardhmja e vendit është përgjegjësi e të gjithëve. Sot më shumë se kurrë kërkohet unitet për të arritur objektivat kombëtarë.
Do të inkurajoj cdo veprim për të arritur marrëdhënie të shëndosha mes institucioneve kushtetuese. Të vijojmë me rrugën e reformës në drejtësi për të goditur krimin dhe korrupsionin. Ndërtimi i një sistemi të pavarur dhe me integritet garanton luftë kundër krimit dhe korrupsionit që cenojnë rëndë sigurinë kombëtare. Reforma në drejtësi me ndihmën e aleatëve tanë, SHBA-BE po jep frytet e saj.
Shpreh mirënjohjen për ndihmën e pakursyer. Te Shqipëria miqtë tanë do të gjejnë kurdoherë partnerin e besuar. Kam privilegjin të marr detyrën në një moment të rëndësishëm të shtetit shqiptar. Mbajtja e konferencës së parë ndërqeveritare është arritje e madhe, falë reformave të ndërmarra” tha ai.
