Ish-kryeministri Sali Berisha tha sot se Edi Rama e shkarkoi Arben Ahmetajn nga posti i numrit dy në qeveri për të shpëtuar veten e tij nga skema e aferës së inceneratorëve. Sipas tij, firma që dogji Ahmetajn ishte fondi 55 mln euro që kaloi nga emergjenca te inceneratorët, por edhe firma te projekti i impiantit të Tiranës.
“Arben Ahmetaj është strumbullar i vjedhjes. Por i dyti pas Edi Ramës është mafiozi, Don Agaçio, dhuratë-madhi. Po pse ai është strumbullari? Ekipi për vjedhjen ka pasur tre ushtarë, Zoton, Gugaljan dhe Mërtirin. Arben Ahmetaj, i cili i pyetur në komisionin hetimor parlamentar për njohjen me Zoton, paraqiti traumën që pësoi dhe nuk pohoi atë njohje.
Ai ka qenë menaxher i kompanisë Hermes që ka vjedhur 13.3 mln euro impulse. Ahmetaj pësoi një aksident në Maqedoni, ku ishte i shoqëruar nga këta mafiozë. Ahmetaj ka firmosur shndërrimin e fondin të emergjencës për djegësit dhe jo pak, por 55 mln euro. Ai vërtetë nuk ka firmosur te kontrata e djegësit të Tiranës, por te projekti i djegësit të Tiranës.
Ai sot u shkarkua vetëm me një qëllim, të shpëtojë lëkurën e Edi Ramës. Madhor në këtë aferë është Erion Veliaj. Harrojeni përfundimisht fjalën korrupsion, të përdorim fjalën vjedhje, se ky është përkthimi i saktë i kësaj fjale në gjuhën shqipe” tha ai.
Sali Berisha u shpreh se Edi Rama e shkarkoi Ahmetajn për t’i dhënë mundësinë që të arratiset për të shpëtuar nga burgu. “Me shkarkimin e tij, krijimi i mundësisë së tij për t’u arratisur nga Shqipëria. Në 2005 u arratis disa vite në Rumani për të kërkuar azil politik.
Tani ai e liron vetëm që ai të largohet. Unë i them Edi Ramës, edhe në ata satelitët që po porosit po shkoi, në mënyrë absolute do të bëhet përgjegjës përpara shqiptarëve me aferën e tij dhe të tjera.
Mos merr mundimin me u larguar se edhe prapa diellit do të gjejmë, do të rëndohesh shumë” tha ai.
