Ndërsa raportohej për aksident dhe më pas vrasje të dyfishtë në autostradën Fier-Vlorë, autorët e ngjarjes së rëndë duket se kishin llogaritur gjithçka me detaje dhe u arratisën në fshatrat e Fierit.
Autorët dyshohet se kanë ndjekur për kilometra të tëra viktimat në një rrugë ku limiti i shpejtësisë është me 110 kilometra në orë, ndërsa pritën pikërisht daljen e autostradës për në fshatin Panaja për të pasur sa më të lehtë më pas arratisjen e tyre dhe humbjen e gjurmëve.
Ndërsa ngjarja u raportua në autostradë dhe policët u dyndën aty, autorët u larguan të qetë. Pak minuta pas ngjarjes, ata dogjën edhe automjetin me të cilin dyshohet se kanë kryer krimin.
