Edi Rama vendosi sot që të shkarkonte Gledis Nanon nga posti i drejtorit të policisë së shtetit.
Në vendin e tij, deri në emërimin e një drejtori të ri, do të jetë i komanduar nëndrejtori, Tonin Vocaj.
Kryeministri Edi Rama gjatë dëgjesës për rihapjen e basteve e vlerësoi punën e Tonin Vocajt.
“Do të doja t’ja jepja fjalën drejtorit të përgjithshëm, zv-drejtorit, deri para pak kohësh drejtor i departamentit të luftës kundër krimit të organizuar.
Ka qenë një nga pikat që kemi diskutuar dhe ku drejtori ka realisht investuar shumë nga kapaciteti i tij dhe i gjithë policisë me disa aksione të suksesshme” tha Edi Rama.
Vocaj bëri një ekspoze të gjithë punës së bërë në luftën kundër basteve.
“Drejtori ka tërhequr vëmendjen për goditjen e veprimtarisë dhe në zbatim të këtyre porosive u dërgua plani i masave me detyra konkrete.
Veprimtaria kryhet online për të shmangur kapjen” tha ai. Ai i kërkoi Edi Ramës rihapjen e basteve.
“Sugjerojmë rishikimin e ligjit për lojërat e fatit për formalizimin e basteve sportive online edhe nga fakti që në vendet e tjera është e ligjshme.
Formalizimi i kazinove nuk duhet lejuar” tha ai.
