Kryetari i Partisë së Lirisë, Ilir Meta njoftoi sot se brenda 24 orëve do të zyrtarizojë vendin ku do të zhvillohet protesta e parë.
Ai nuk dha detaje se kur do të zhvillohet dhe ku, por një indicie po.
Ish-presidenti u shpreh se do të protestojë te “veprat e krimit” ku “po vidhen qytetarët”.
“Partia e Lirisë ka një axhendë të sajën për të nisur protestat anti-korrupsion te vetë veprat e krimit që janë kryer që po kryhen po konsumohen.
Një nga protestat e para do të njoftohet në këto 24 orë. Do të ketë protesta aty ku ndodh krimi dhe vidhet qytetari dhe taksat e tij” tha ai.
Referuar denoncimeve të Partisë së Lirisë, kryefjalë kanë qenë inceneratorët. Kjo do të thotë se një nga skenarët është që protesta e parë të zhvillohet pikërisht tek këto impiante.
Tre janë inceneratorët; Tiranë, Fier dhe Elbasan. Nëse do të protestohet përpara këtyre impianteve, shanset janë më të mëdha që të zgjidhet Tirana.
Megjithatë ende nuk ka asgjë zyrtare si për vendin dhe datën.