Policia greke plagosi dhe arrestoi dje një shqiptar gjatë një aksioni të zhvilluar në rezidencën studentore. Ai dyshohej se kishte aktivitet të trafikut të drogës.
Në momentin e aksionit për të shpëtuar, shqiptari qëlloi me kaçavidë një police greke dhe më pas u qëllua me armë nga autoritetet duke mbetur i plagosur.
Ai është Esmin Ferhati 30-vjeç dhe njihej edhe me emrin Esko dhe raportohet se është kreu i bandës kriminale.
Në tre katet e fundit të konviktit strehoheshin kundrejt tarifës prej 100 Euro në muaj, ku kishin të përfshira energjinë elektrike, internetin dhe ujin.
“Ata qarkullonin me Mercedes dhe bënin jetë luksi me paratë e krimit, pazaret e drogës, vjedhjet e madje dhe rrëmbimet”, shkruan Protothema.
30-vjeçari shqiptar i quajtur Esko akuzohet gjithashtu se në Maj të vitit 2019 rrëmbeu djalin e mitur të një gazetari grek dhe e mbajti të fshehur pikërisht në rezidencat studentore.
Pjesë e këtij grupi kriminal ishte edhe një vajzë e re, e cila sapo ishte futur në radhët e policisë greke dhe shërbente si informatore për këtë grup.
Kjo police e re ishte rekrutuar nga Esko dhe anëtarët e tjerë të grupit dhe ndihmonte ata me informacione, duke dekonspiruar kolegët e tyre.
Më pas ai dhe bashkëpunëtorët e tjerë hynë në banesën e gazetarit grek dhe e grabitën.
Sipas mediave greke Esko u përfshi në rrjetin e trafikut të drogës, grabitjeve dhe rrëmbimit nga xhaxhai i tij.
