Deputeti i PD-së, Petro Koçi është shprehur se krimi në zonën e Fierit ka arritur të prek dhe fondet publike.
Sipas tij, persona me të shkuar kriminale kanë arritur të përfitojnë tenderë nga fondet e bashkisë. Nga ana tjetër SPAK ka refuzuar të nis çështjen e hetimit për këtë gjë. Ai ka treguar se nuk disponon asnjë provë për akuza të tilla.
“Protagonistë të trafikut të drogës dhe të dhunës tashmë kanë legalizuar subjekte biznesi që fitojnë tenderë publike. Këtë e realizojnë ose nëpërmjet lidhjeve të drejtpërdrejta me ndonjë titullar institucionesh ose nëpërmjet kërcënimit të zyrtarëve të caktuar që ekzekutojnë prokurimet si edhe nëpërmjet eliminimit të konkurrentëve në procesin e tenderimit duke kërcënuar pronarët e subjekteve të biznesit”, shkroi Koçi, në 2021.
Koçi është përballur edhe me një pyetje tjetër në SPAK, ku i është kërkuar të deklaronte nëse kishte ndonjë informacion konkret për subjektet e krimit të organizuar, zyrtarët publikë dhe për cilat raste bëhej fjalë.
