Baza e PD-së është duke pritur bashkimin e partisë përpara zgjedhjeve lokale. Kështu thanë të paktën drejtuesit e tre qarqeve të pjesës së PD-së që drejtohet nga Sali Berisha.
“Për qarkun e Korçës strukturat janë plotësuar me të gjithë elementët. Tani jemi gati për primaret për zgjedhjet vendore.
Ne e dimë që në grupin parlamentar ka një ngërç, që është e domosdoshme të kapërcehet. Kapërcimi arrihet përmes bisedimeve.
Uroj që të dalim me një kandidat të përbashkët në zgjedhjet vendore”, tha Edmond Spaho.
“Ne kemi thënë vazhdimisht që dyert e PD janë të hapur për çdo demokrat që vendos t’i bashkohet shumicës”, tha Bardh Spahia, kryetar bashkie dhe drejtues i PD-së për qarkun e Shkodrës.
Drejtuesi i Fierit, Luan Baçi shkoi edhe më tej duke liruar karrigen e tij për Enkelejd Alibeajn. “Baza është e gjitha bashkë dhe duan që të bisedojnë, pavarësisht skepticizmit tim që e kam shprehur se nuk kam besim te z. Bardhi.
Jam i gatshëm me z. Alibeaj dhe të gjithë deputetët etj të Fierit të dalim në bazë. Baza me zor e pret. Madje do ia lija vendin tim si drejtues qarku, vetëm të vinte”, u shpreh ai.
Nesër pritet që të takohet për herë të parë Edi Paloka nga grupi i Berishës dhe Gazment Bardhi nga grupi i Enkelejd Alibeajt për të diskutuar për të dalë me një kandidat në zgjedhjet lokale.
