Gjykata e Posaçme ka shpallur fajtor deputetin e Partisë Demokratike, Bardh Spahia, duke e dënuar me një gjobë prej 100 mijë lekësh për moszbatimin e një vendimi të gjykatës.
Rasti lidhet me largimin nga detyra të ish-drejtorit të Ujësjellës Kanalizimeve, Mark Molla, i cili kishte bërë kallëzim për shkarkimin e tij të padrejtë.
Hetimet kanë treguar se Spahia kishte organizuar një mbledhje të Asamblesë së Përgjithshme, ku u mor vendimi për të mos riemëruar Mollën në detyrë.
Më pas, në një mbledhje tjetër të zhvilluar më 18 korrik 2022, Molla u shkarkua dhe u emërua Arvit Bushati si drejtor i ri i institucionit.
Sipas Prokurorisë, këto veprime janë kryer pavarësisht një vendimi gjykate që pezullonte shkarkimin e Mollës, i cili nuk u mor parasysh. Pas shqyrtimit të çështjes, gjykata vendosi dënimin me gjobë për deputetin Spahia.
