Lear Kurti 32-vjeç vdiq mbrëmë në duart e policisë së shtetit. Deri tani kemi vetëm një njoftim nga Agjencia e Mbikëqyrjes Policore, që është kontradiktor. Misteri dhe enigmat janë të mëdha për orët e fundit të të të riut.
“5pyetjet.al” ilustron përmes një harte lëvizjet në Tiranë, bazuar te njoftimi nga Agjencia e Mbikëqyrjes Policore. Sipas njoftimit rreth orës 23:07, Patrulla e Përgjithshme e Komisariatit të Policisë Nr. 3 Tiranë gjatë kontrollit të territorit e ka konstatuar të riun në rrugën “Riza Cuka”.
Po sipas policisë, pasi nuk ndaloi për kontrollin i riu u ndoq dhe u kap në rrugën “Don Bosko”, duke kryer më pas edhe shoqërimin e tij në ambientet e Komisariatit të Policisë Nr. 3 në Tiranë.
“Gjatë shoqërimit të tij, ky shtetas ka shfaqur probleme shëndetësore sapo ka mbërritur në ambientet e Komisariatit. Menjëherë është kërkuar ndihma e shërbimit të Urgjencës dhe për shkak se situata shëndetësore e tij është rënduar, ky shtetas është dërguar me mjetet e Policisë në Spitalin e Traumës, ku edhe ka ndërruar jetë” thotë AMP.
