Ministrat e jashtëm të BP kanë rënë dakord në Berlin për lëvizjen e lirë me ID mes shtetasve të rajonit. Po ashtu, njohjen e diplomave universitare dhe njohjen e kualifikimeve profesionale.
Falë angazhimit diplomatik të qeverisë gjermane, vendet e Ballkanit Perëndimor kanë arritur të premten në Berlin të bien dakord për nënshkrimin e tre marrëveshjeve të reja në kuadër të bashkëpunimit rajonal. Këtë e bëri të ditur të premten në Berlin, ministrja gjermane e Punëve të Jashtme, Annalena Baerbock. Kjo në kuadër të ministerialit të ministrave të jashtëm të vendeve të Procesit të Berlinit.
Heqja e vizave mes Kosovës dhe Bosnjës
Tri marrëveshjet parashikojnë: lëvizjen e lirë me karta identiteti të personave ndërmjet vendeve të Ballkanit Perëndimor. Njohjen e diplomave universitare dhe njohjen e kualifikimeve për tre profesione: mjekët, dentistët dhe arkitektët.
Ministrja e Jashtme theksoi se përfitimin më të madh nga kjo marrëveshje e kanë njerëzit nga Kosova dhe Bosnja-Hercegovina. Ata nuk do të kenë nevojë për vizë për të vizituar njëri-tjetrin.
“Kjo do të thotë që të rinj kosovarë dhe boshnjakë do të vizitojnë njëri-tjetrin pa viza. Gjë që për ne evropianët është e zakonshme. Do të thotë që studentët nga Shqipëria mund të përdorin diplomën e tyre bachelor për të punuar në Maqedoninë e Veriut. Dhe që arkitektët nga Serbia të punojnë në Mal të Zi”. Baerbock tha se këto marrëveshje lehtësojnë rrugën për krijimin e një Tregu të Përbashkët Rajonal.
Heqja e tarifave për njohjen e diplomave dhe kualifikimeve
Krahas të dërguarit të posaçëm të qeverisë gjermane për Ballkanin Perëndimor, Manuel Sarrazin, për arritjen e marrëveshjeve ka punuar edhe Këshilli i Bashkëpunimit Rajonal, me qendër në Sarajevë. Sekretarja e përgjithshme e tij, Majlinda Bregu, sqaroi se falë marrëveshjes tani të diplomuarit nuk do të kenë nevojë të paguajnë më tarifa prej 200 deri 500 euro për njohjen reciproke të diplomave. “Me këtë marrëveshje, kjo kosto do të jetë zero. Për qytetarët ky është një fitim real”, tha ajo. Bregu tha se falë marrëveshjes së lëvizjes së lirë të njerëzve, bie edhe “muri i fundit i regjimit të vizave në Ballkanin Perëndimor, ai mes Kosovës dhe Bosnjë-Hercegovinës”.
Bregu tha se “tani ka ardhur koha që të hiqen tarifat roaming mes Ballkanit Perëndimor dhe BE-së.”
Nënshkrimi përfundimtar pritet më 3 nëntor
Dokumenti përfundimtar do të nënshkruhet në samitin e 3 nëntorit në Berlin. Në prani të gjithë liderëve të shteteve dhe qeverive të Ballkanit Perëndimor dhe të dhjetë vendeve të tjera pjesëmarrëse të Procesit të Berlinit. Po ashtu edhe përfaqësuesve të Këshillit të Bashkimit Evropian dhe Komisionit të BE./DW
