Shqipëria dhe Shtetet e Bashkuara të Amerikës kanë rikonfirmuar partneritetin strategjik dhe janë angazhuar për të vijuar bashkëpunimin me interes të përbashkët në fusha si: mbrojtja, siguria kibernetike, energjia, transporti apo tregtia.
Ka qenë kjo garancia e dhënë nga Sekretari Amerikan i Shtetit, Antony Blinken, në përfundim të dialogut të partneritetit strategjik të zhvilluar me palën shqiptare.
Delegacioni shqiptar ishte i kryesuar nga Ministrja për Evropën dhe Punët e Jashtme, Olta Xhaçka.
Ai vlerësoi bashkëpunimin në të gjitha fushat dhe shprehu gatishmërinë dhe vullnetin e SHBA-ve për ta thelluar bashkëpunimin në energji, biznes e të tjera duke e parë Shqipërinë si një pikë referimi në rajon.
Sekretari Blinken shprehu mirënjohjen e SHBA-ve ndaj Shqipërisë si një aleate që gjithmonë ka marrë përsipër përgjegjësitë e saj.
Ai po ashtu ka vlerësuar faktin që Shqipëria strehoi shtetasit afganë dhe nënvizoi se SHBA-të do të jenë gjithmonë në krah të vendit.
Kryediplomatja Xhaçka falënderoi sekretarin Blinken dhe qeverinë amerikane për mbështetjen dhe bashkëpunimin në mbrojtjen e demokracisë, situatës në Ukrainë, mbrojtjes kibernetike modernizimit të Forcave të Armatosura apo projekteve në zhvillimin në fushën e energjisë.
