Breshëria e plumbave drejt një makine “Touareg” të zezë me targa angleze tronditi mbrëmë lagjen “Skënderbeg” në Shkodër. Shkaku që solli plumbat ishte një debat mes dy vëllezërve Ardian dhe Davide Kiri dhe Kristian Fermosit. I arrestuari i vetëm është Davide Kiri, ndërsa në kërkim janë shpallur Ardian Kiri dhe Kristian Fermosi.
Por si ndodhi ngjarja?
Ardian Kiri dhe Kristian Fermosi janë konfliktuar mes tyre. Ngjarja ndodhi rreth orës 23:00 në kryeqendrën e veriut. Debati agravoi. Në këtë moment në ndihmë të Ardianit shkon i vëllai, Davide, i cili goditi Kristianin.
Përballë dy vëllezërve, Fermosi nxori armën duke qëlluar drejt tyre. Plumbat fatmirësisht kapën makinën “Touareg” dhe jo dy vëllezërit. Autori arriti që të largohej me shpejtësi duke humbur gjurmët mes errësirës. Po ashtu u larguan edhe dy vëllezërit. Por njëri prej tyre u arrestua.
Kush është Ardian Kiri?
Ardian Kiri që mbrëmë u shpëtoi plumbave rezulton emër i njohur jo vetëm për shkodranët por edhe drejtësinë. Kiri ka qenë drejtor i ALUIZNI-t në Shkodër, por ka qenë edhe më parë i akuzuar për vrasjen e Marjan Martinit dhe tentativës për vrasje të Nik Gjonlulajt dhe djalit të tij Amarildo Gjonlulajt.
Gjykata e ka dënuar Kirin vetëm për akuzën e “Armë mbajtjes pa leje” me 5 vite burgim ndërsa Apeli e la të lirë. Emri i Kirit del edhe në relacionet e prokurorisë për ngjarjen e 21 janarit në 2011, ku ishte pjesë e demonstratës që përfundoi me 4 të vrarë në bulevardin “Dëshmorët e Kombit”.
“Ç’ke me vëllanë tim”! Dinamika, si ndodhi sherri që përfundoi me plumba në Shkodër
