Sot u shënua dy vjetori i vrasjes së Klodian Rashës nga efektivi i policisë së Tiranës, Nevaldo Hajdaraj, që është dënuar me 12 vite burg. Por ish-polici nuk është dakord me vendimin e Apelit dhe për këtë arsye e ka çuar dosjen në Gjykatën e Lartë.
Në rekursin që ka depozituar përmes avokatit, ish-punonjësi i Policisë së Tiranës kërkon gjykimin nga një kolegj penal, me argumentin se ai ka kryer vrasjen në kushtet e tejkalimit të kritereve të mbrojtjes. Por pamjet filmike treguan se Hajdari qëlloi dy herë me armë me dashje.
Klodian Rasha u ekzekutua pak para mesnatës së 8 dhjetorit 2020 pranë banesës së tij në zonën e Laprakës, pasi Hajdaraj e ndoqi për ta ndëshkuar në lidhje me shkeljen e orës policore të vendosur për shkak të pandemisë dhe mosmbajtjen e maskës anti-Covid.
Efektivët i kanë bërë thirrje për të ndaluar që në zonën e “Don Boskos”, por ai është frikësuar dhe ka vendosur që të largohet me vrap. Gjyqtari Medi Bici do të vendosë në dhomë këshillimi për fatin e rekursit.
