Kuvendi i Kosovës ka miratuar zgjatjen e masave emergjente për energji edhe për një muaj, ashtu siç kishte propozuar Qeveria e Kosovës.
Kjo është hera e pestë që brenda këtij viti, deputetët votojnë për zgjatjen e këtyre masave dhe masat janë në fuqi që nga korriku i këtij viti.
Ministrja e Ekonomisë, Artane Rizvanolli, në seancën parlamentare të 8 dhjetorit tha se masat duhet të zgjaten për shkak të krizës energjetike në Evropë.
Kundër zgjatjes së këtyre masave ishin deputetët opozitarë, të cilët thanë se ekzekutivi vetëm po kërkon zgjatjen e tyre, por nuk po bën veprime konkrete për të përmirësuar situatën me energji elektrike.
Deputetët opozitarë kërkuan sqarime nga ministrja Rizvanolli se çfarë veprimesh ka marrë Qeveria për përmirësimin e situatës gjatë periudhës sa janë në fuqi masat emergjente për energji. Por, Rizvanolli nuk iu është përgjigjur pyetjeve të deputetëve opozitarë.
Ish-ministri i Energjisë, Ethem Çeku, tha se zgjatja e masave emergjente nuk zgjidh problemet me të cilat përballet Kosova në fushën e energjisë.
Sipas tij, rruga e vetme e Qeverisë së Kosovës për të zbutur problemin me energji elektrike, është kthimi në funksion i blloqeve të termocentralit Kosova A.
“Duhet hyrë në rehabilitim të thellë të atyre blloqeve dhe t’i hapim dyert sektorit privat për investime në sektorin e energjisë alternative. Masat emergjente asnjëherë nuk kanë dhënë rezultate. Rezultate japin vetëm politikat zhvillimore të sektorit të energjisë”, tha Çeku për Radion Evropa e Lirë.
