Sipas një studimi të Organizatës Ndërkombëtare të Punës, pothuajse një në pesë punonjës në mbarë botën është i prekur nga dhuna në punë. ILO njofton për forma të ndryshme të dhunës.
Organizata Ndërkombëtare e Punës (ILO) është ankuar këto ditë shumë qartë për dhunën dhe ngacmimin e përhapur në punë. Në një anketë të bërë me punonjës nga shumë vende të botës, pothuajse 23 për qind prej tyre deklaruan se ishin sulmuar psikologjikisht, fizikisht ose seksualisht në vendin e punës.
Forma më e shpeshtë e sulmeve ishte dhuna psikologjike dhe ngacmimi seksual: Rreth 18 për qind e të anketuarve përjetuan fyerje, ngacmim ose frikësim. Dhuna fizike, si rrahja apo pështyrja, u rendit në vendin e dytë me 8,5 për qind. Rreth gjashtë për qind raportuan sulme seksuale, duke filluar me komente dhe fjalë të turpshme.
Më shumë se tre nga pesë viktima raportuan se kishin përjetuar në mënyrë të përsëritur sulme dhe ngacmime të ngjashme në punë. “Është e dhimbshme të mësosh se njerëzit përballen me dhunë dhe ngacmime jo vetëm një herë, por disa herë në jetën e tyre të punës”, tha zëvendësdrejtoresha e përgjithshme e ILO, Manuela Tomei në Gjenevë.
Studimi bazohet në anketat e kryera në vitin 2021 me gati 75.000 punonjës të moshës 15 vjeç e më shumë. Anketa është kryer në 121 vende dhe rajone të ndryshme të botës. Sipas ILO, ky është sondazhi i parë i këtij lloji, me përmasa kaq të mëdha. /DW
