Aktori Henry Cavill përmes një postimi nga llogaria e tij personale në Instagram ka njoftuar se ai nuk do të veshë më pelerinën e kuqe të Supermenit në universin kinematografik DC.
Në postimin e tij të gjatë, aktori 39-vjeçar ka shkruar: “Sapo pata një takim me James Gunn dhe Peter Safran dhe lajmi është i trishtuar. Në fund të fundit, nuk do të kthehem si Superman. Meqenëse nga studio më thanë të njoftoja rikthimin në tetor, para se të punësoheshin, ky lajm nuk është më i lehtë, por i tillë është jeta. Ndryshimi i gardës është diçka që ndodh. Unë e respektoj atë. James dhe Peter kanë një univers për të ndërtuar. I uroj atyre dhe të gjithë të përfshirëve në këtë punë më të mirë.
Për ata që kanë qenë pranë meje gjatë gjithë këtyre viteve, ne mund të vajtojmë për pak kohë, por pastaj duhet të kujtojmë….. Supermeni është ende këtu. Gjithçka që ai përfaqëson ekziston ende, dhe shembujt që ai na jep ekzistojnë ende! Radha ime për të veshur pelerinën ka kaluar, por ajo që përfaqëson Supermeni nuk do të kalojë kurrë.”
Pas publikimit të lajmit se Cavill u shkarkua nga roli i tij legjendar kanë reaguar fansat.
Në vazhdën e njoftimit të pakëndshëm për fansat, reagimet ishin të forta, ku disa fajësuan shkarkimin e Cavill për shkak të aktorit Dwayne Johnson.
Përmes një videoje që ai kishte postuar në Twitter, në të cilën ai festoi publikimin dixhital të “Black Adam”, Johnson theksoi se ai u përpoq për të rikthyer Cavill në rolin e famshëm.
