Altin Dumani dje kishte ditën e parë të punës si shef SPAK-u. Ai mori detyrën e drejtuesit pas zgjedhjes nga KLP duke pasuar Arben Krajën, që i mbaroi mandati 3 vjeçar pa të drejtë zgjedhje.
Drejtuesi i ri nuk është i anatemuar për dosjet që ka gjykuar apo pasurinë. Ai është i preferuari i SHBA-së. Por cila është pasuria e tij?
ILDKPKI që është institucioni përgjegjës për deklarimin, kontrollin e pasurisë dhe konfliktin e interesit për zyrtarët e lartë shtetërorë dhe publikë u bëri një skaner të ardhurave të Dumanit, ashtu si edhe vetë komisioni i Pavarur i Kualifikimit duke mos gjetur asnjë shkelje.
“Altin Dumani zotëron apartament në Yzberisht blerë në 2015. Përputhen deklarimet me dokumentet përfshirë edhe të dhënat e drejtorisë së pastrimit të parave që transaksionet i konsideron të sakta dhe pa probleme.
Ai ka deklaruar se banon në një shtëpi të prindërve të gruas dhe apartamentin e tij i ka lënë me qira. Deklarimet e Dumanit përputhen me dokumentet e administruara nga institucionet. Pagesa është bërë në dy këste 9 mijë euro cash nga kursimet, 42 mijë euro (ose 50 mln lekë) kredi kësti i dytë.
Dumani ka pronësi një apartament me vlerë 50 mijë euro, ku 5 mln lekë i ka marrë kredi. Apartamenti i blerë në 2006. Ai zotëron një sipërfaqe 29 metra katrore ambient (zyre). Blerë në shumën 28 mijë euro” këto ishin disa nga gjetjet e KPK për Dumanin.
Asokohe, vëzhguesi i OMN-së deklaroi “Kam marrë pjesë në 25 çështje dhe kjo është hera e parë që s’kam asnjë pyetje. Zoti Dumani qenka me fat”, u shpreh Jacobs.
