Sekretari i Përgjithshëm të Partisë së Lirisë, Tedi Blushi shprehet se Edi Rama e vendosi shtetin në funksion të punësimit të patronazhistëve. Për këtë ai i referohet raportit të INSTAT-it, që nga viti 2014 në sektorin publik janë shtuar rreth 22 mijë punonjës. Më tej, Blushi thotë se vetëm vjet për zgjedhjet në momentin e fushatës elektorale, administrata u rrit me rreth 8 mijë persona.
“Vënia e shtetit në funksion të punësimit të patronazhistëve është prova më e rëndë e degradimit të administratës publike nga Edi Rama. Instituti i Statistikave raporton se nga viti 2014 në sektorin publik janë shtuar rreth 22 mijë punonjës. Vetëm vitin e kaluar në momentin e fushatës elektorale, administrata u rrit me rreth 8 mijë persona.
Meta: Falë “Rilindjes” jemi të parët për korrupsion në kontinent
Për shkarkimet partiake dhe pa ligj shteti shqiptar është detyruar të paguajë në 8 vitet e fundit më shumë se 108 milionë euro për të shlyer faturat gjyqësore për pushime të padrejta nga puna të 15 mijë punonjësve. Kur erdhi në pushtet, Edi Rama premtoi një administratë publike efikase dhe me numër më të vogël punonjësish. Por faktet tregojnë totalisht të kundërtën.
Pas reformës në pushtetin lokal në vitin 2015, në vend se numri i punonjësve të pakësohej, siç u trumbetua me të madhe, përkundrazi, administrata u dyfishua dhe nga 19.600 punonjës shkoi në 35 mijë punonjës duke i kushtuar Buxhetit të Shtetit rreth 100 milion euro shtesë.
Ndërsa shteti i kapur hap vende pune, të cilat nuk kanë asnjë ndikim në zhvillimin shoqëror dhe ekonomik të Shqipërisë, për të “rehatuar” patronazhistët, dhjetëra mijëra vende pune humbin në sektorët më prodhues dhe mijëra biznese mbyllen dhe falimentojnë. Prandaj është koha për të çliruar administratën nga fuksat dhe patronazhistët dhe për ta kthyer shtetin në shërbim të qytetarit” tha ai.
