Një delegacion i madh ukrainas i kryesuar nga zonja e parë, Olena Zelenska po udhëton për në Davos, Zvicër këtë javë me qëllim që të përpiqet të bindë Perëndimin për të ofruar më shumë ndihmë humanitare dhe armë në vend.
“Kjo është arsyeja pse unë jam këtu,” tha kryebashkiaku i Kievit dhe ish-boksieri Vitali Klitschko të hënën në Davos përpara gazetarëve që ta pyesnin për nevojën për ndihmë të mëtejshme, gati një vit pas fillimit të pushtimit rus.
“Kjo është arsyeja pse është shumë e rëndësishme të takohemi, të bisedojmë me njëri-tjetrin. Është e rëndësishme të kemi marrëdhënie personale”, shtoi zyrtari ukrainas.
Ukraina ishte tashmë në maj në qendër të diskutimeve në takimin e mëparshëm të organizuar nga Forumi Ekonomik Botëror, në malet zvicerane, ku tradicionalisht marrin pjesë qindra liderë politikë dhe drejtues të kompanive të mëdha.
Për ngjarjen e vitit 2023, Zelenska do të jetë ndër folësit e parë ndërkombëtarë që do të marrë fjalën personalisht të martën, ndërsa Presidenti Volodymyr Zelensky do të flasë përmes video-konferencës të mërkurën.
Shumë zyrtarë ukrainas priten në Davos këtë javë – duke përfshirë kryebashkiakët e Mykolaiv dhe Lviv, ministrat e ekonomisë, kulturës dhe transformimit dixhital – me delegacionin ukrainas një nga më të mëdhenjtë në Forum.
“Ekonomia e Ukrainës është shkatërruar plotësisht , infrastruktura është shkatërruar, jeta paqësore e bashkatdhetarëve tanë është shkatërruar,” u tha gjithashtu Klitschko gazetarëve në Davos.
Lufta është “një tragjedi pasi Putini ka idenë e çmendur të dëshirës për të rindërtuar Perandorinë Sovjetike. Jetonim në Perandori dhe nuk duam të kthehemi në BRSS”, shtoi politikani ukrainas duke thënë se “brenda familjes europiane ne shohim të ardhmen tonë”.
Ashtu si majin e kaluar, udhëheqësit dhe biznesmenët rusë nuk u ftuan në Davos dhe disave u ndalohet të udhëtojnë në Evropë për shkak të sanksioneve.
