Policia e Tepelenës njofton se ka vënë në pranga njërin nga agresorët e mësuesit 59-vjeçar, Kleanthi Laçi.
Bëhet fjalë për një 29-vjeçar, i cili rezulton se është i vëllai i një të miture, e cila e akuzon profesorin e saj se e ka ngacmuar disa herë seksualisht. Dhe për këtë arsye, ajo kishte lajmëruar të vëllanë, i cili së bashku me dy shokë të tij e kanë rrahur mësuesin.
Por, as ky i fundit nuk ia ka hedhur paq, pasi Policia e ka vënë edhe atë në pranga teksa e akuzon për kallëzim të rremë dhe ngacmim seksual ndaj dy të miturave.
NJOFTIMI I POLICISË SË TEPELENËS:
Tepelenë/ Specialistët e Seksionit për Hetimin e Krimeve të Komisariatit të Policisë Tepelenë, në përfundim të veprimeve hetimore të kryera nën drejtimin e Prokurorisë pranë Gjykatës së Rrethit Gjyqësor Gjirokastër, për ngjarjen e ndodhur në datën 16.01.2023, në vendin e quajtur “Zona industriale”, Tepelenë, ku disa shtetas kanë goditur me mjete të forta shtetasin K. L., 59 vjeç, banues në Tepelenë (mësues), kanë ndaluar njërin prej autorëve të dyshuar, shtetasin:
- G., 29 vjeç, banues në Tepelenë, për veprat penale “Plagosja e lehtë me dashje”, kryer në bashkëpunim dhe “Vetëgjyqësia”. Vijon puna intensive për identifikimin, kapjen dhe vënien përpara përgjegjësisë ligjore të bashkëpunëtorëve të tij.
Gjithashtu, në vijim të veprimeve hetimore, nga specialistët e Seksionit për Hetimin e Krimeve në Komisariatin e Policisë Tepelenë u bë ndalimi i shtetasit të dëmtuar K. L., 59 vjeç, për veprat penale “Ngacmimi seksual” dhe “Kallëzimi i rremë”.
Ndalimi i këtij shtetasi u bë pasi nga kallëzimet e marra në lidhje me këtë rast, dyshohet se ai ka ngacmuar seksualisht 2 shtetase të mitura. Materialet procedurale i kaluan Prokurorisë pranë Gjykatës së Rrethit Gjyqësor Gjirokastër, për veprime të mëtejshme.
