Mediat italiane zbardhin detaje të reja nga ngjarja tragjike ku humbi jetën Elion Shala 15-vjeç, shqiptar që mbrëmjen e së dielës u përplas nga një tren.
Adoleshenti me origjinë shqiptare ishte lindur dhe rritur në Itali. Ngjarja e rëndë u shënua rreth orës 18:30 në stacionin Chiari ku një tren i “Eurocity” nuk frenoi dot dhe përplasi duke i marrë jetën shqiptarit që po kalonte shinat.
Elioni ishte me miqtë e tij pasi kishin kaluar pasditen bashkë në Romano di Limbardia.
Policia hekurudhore bashkë me policinë kanë zbuluar se djali tentoi të kalonte shinat për të arritur miqtë e tij të cilët ndodheshin nga ana tjetër. Ishte pikërisht ky momenti i tmerrshëm që i mori jetën.
Elioni ishte student i vitit të dytë në gjimnaz dhe prej disa muajsh luante me fanellën e Chiarit në futboll për grupmoshat nën 16 vjeç.
