Një rreze e vogël drite në panoramën e “zezë” ka ardhur për botën e futbollit pas tërmetit shkatërrues prej 7.8 gradësh të shkallës Rihter që tronditi zonat në kufirin e Turqisë dhe Sirisë.
Sipas raportimeve është bërë e mundur nxjerrja gjallë nga rrënojat e futbollistit të Hatayspor, Christian Atsu.
Ish-mesfushori ganez i Chelsea dhe Newcastle ndodhej brenda një ndërtese që u shemb për shkak të tërmetit vdekjeprurës në Turqi, por mbrëmjen e së hënës u gjet i gjallë nga ekipet e shpëtimit.
Ndërtesa ku Atsu jetonte me shokët e skuadrës në Hatayspor “ra” tërësisht nga tërmeti, por ai u nxor nga rrënojat.
Siç raporton portugeze “Abola”, 31-vjeçari ganez po përjeton vështirësi në frymëmarrje dhe ka dëmtuar këmbën e djathtë, por ndodhet jashtë rrezikut dhe është dërguar menjëherë në spital.
Në të njëjtën ndërtesë nga e cila u tërhoq Atsu kishte edhe lojtarë të tjerë nga Hatayspor të cilët janë gjithashtu të bllokuar.
Ekipet e shpëtimit ende nuk kanë mundur të gjejnë drejtorin sportiv, Taner Savut dhe përkthyesin e ekipit.
