Kontejneri, i cili mbërriti në Vado Ligure në bordin e M/n “Victoria L”, i ardhur nga Ekuadori me një ngarkesë banane, u identifikua nga autoritetet gjatë monitorimit të zakonshëm të flukseve të tregtisë detare që përfshijnë qendrat portuale të Savonës dhe Vado Ligure, që synonin veçanërisht dërgesat transnacionale të mallrave nga zonat gjeografike të konsideruara “në rrezik”.
Kontejneri i zbritur nga anija i është nënshtruar një kontrolli të imtësishëm, i cili ka çuar në zbulimin e kokainës, me peshë afërsisht 60 kg dhe të ndarë në 50 pako me vlerën e shitjes me pakicë mbi 5 milionë euro.
Hetimet bënë të mundur arrestimin e një shqiptari, i cili posedonte një pistoletë, 13 fishekë dhe një transmetues, teksa tentonte të merrte ngarkesën. I bllokuar nga policia dhe i akuzuar për trafik ndërkombëtar droge, ai u dërgua në burgun Marassi në Xhenova.
