Kryetari i bashkisë Tropojë, Rexhë Byberi vetëm dy muaj përpara zgjedhjeve ka hapur një tender 55 milionë lekë për mbushje gropash në disa rrugë të zonave administrative.
Tenderi është hapur sot dhe mbyllet në datë 21 Mars për t’u shpallur më pas fituesi. Pra që në rastin më të mirë puna nis një muaj përpara zgjedhjeve për të mbushur gropat.
Nuk po bëjmë aspak shaka apo ironi. Edhe titulli i objektit të tenderit është i tillë “asfaltim i rrugëve, mbushje gropash viti 2023 për rrugët e bashkisë Tropojë”.
Pyetja që shtrohet është se çfarë e pengoi zotin Byberi që të vepronte më përpara për të shtruar rrugët apo mbushur gropat apo gjithçka po ndodh për t’u hedhur hi syve banorëve të Tropojës për votat e radhës?
