Ish-kryeministri, Sali Berisha po zhvillon një takim me demokratët e Bulqizës ku po prezanton kandidatin e koalicionit “Bashkë Fitojmë” për Bashkinë, Dëfrim Fiku.
Gjatë fjalës së tij Berisha u shpreh se me primaret demokratët e Bulqizës kanë vendosur një nga standardet më të përparuara. Ai e cilësoi këtë hap si një nga standartet më të përparuara në botë për forcat demokratike.
“Dëfrim Fiku është propozim i juaji, është i votuari i juaj, i besuari juaj, është zgjedhja juaj. Dëfrimi, Ismaili, Skënderi, Bedriu dhe të gjithë kandidatët e këtyre zgjedhjeve janë dhëndurë të lirisë, janë nuse të lirisë.
Ata nuk kanë dalë nga zyra e kryetari, as nga zyra e kryesisë, por kanë dalë nga vullneti juaj dhe u them ju, se kemi shënuar një hap përpara në hapësirën e lirisë, kemi vendosur një nga standardet më të përparuara që ekziston sot në botë për forcat demokratike.
Unë ju garantoj se ky standard do të përsoset, gjithnjë e më shumë dhe se do të jeni ju ata që do të përcaktoni qeveritarët tuaj vendorë, deputetët tuaj, drejtuesit e partisë dhe të gjithë përfaqësuesit tuaj.
Nga ana tjetër unë kam kënaqësinë që paraqes këtu para jush Dëfrim Fikun, një nga intelektualët, një nga qytetarët më shembullorë të Bulqizës, me bindjen më të madhe se Dëfrimi me mençurinë, ndershmërinë, dashurinë dhe përkushtimin për ju dhe Bulqizën, do të bëjë të gjitha përpjekjet që të shndërrojë në shërbime, në ndryshime, në zhvillim, çdo qindarkë të taksave tuaja.
Do të marrë me seriozitetin më të madh çdo propozim tuajin, çdo sugjerim, do të bëjë gjithçka për të shtuar burimet e të ardhurave, për të shtuar financimet për Bulqizën.
Me 14 maj ne votojmë ndryshimin,” u shpreh Berisha.
