Dy persona janë vënë në pranga për trafikim të lëndëve narkotike. Bëhet fjalë për dy rumunë që janë arrestuar pasi në kamperin e tyre u gjet një sasi prej 118 kilogramësh kanabis. Kanabisi u zbulua duke përdorur qenin antidrogë. Burri ka deklaruar se është biznesmen dhe ndodhej në Shqipëri për pushime.
“Si rezultat i këtij operacioni, nga specialistët e Seksionit për Narkotikët dhe Trafiqet e Paligjshme të DVP Korçë u bë arrestimi në flagrancë i shtetasve: G. C., 54 vjeç, banues në Ghimpajti dhe D. B., 36 vjeçe, banuese në Bukuresht, Rumani”, njoftoi policia.
Droga u zbulua në doganën e Kapshticës. Policia thotë se ka ushtruar kontroll të imtësishëm ndaj tyre dhe në pjesën e bagazhit gjetën 79 pako me kanabis.
Kjo nuk është hera e parë që rumunë kanë tentuar të trafikojnë drogë nga Shqipëria. Në Mars u vunë në pranga 4 rumunë pasi u kapën në Vlorë me 260 kilogramë lëndë kanabis.
Arrestimi i 2 rumunëve në Kapshticë, policia: Tentuan të kalonin 118 kg kanabis
