Shoqatat e eksportuesve deklarojnë se forcimi i pandalshëm i lekut ndaj euros është duke vënë në vështirësi serioze të gjitha bizneset që punojnë për eksport. Shoqatat e eksportuesve kërkojnë nga qeveria dhe Guvernatori i Bankës së Shqipërisë ndërhyrje.
“Rënia e euros ndaj lekut në nivelet më të ulëta historike ka dëmtuar dhe vazhdon të dëmtojë rëndë një pjesë të subjekteve të biznesit, gjë e cila shoqërohet me impakte shumë negative në ekonominë e vendit. Ky fenomen nuk mund të lihet në rënie të lirë” shkruhet në letrën e firmosur nga 7 shoqata përfaqësuese të eksportuesve.
Për ministren e Financave dhe Ekonomisë, Delina Ibrahimaj, zhvlerësimi i monedhës europiane lidhet me tre faktorë të tjerë.
“Zhvlerësimi i euros dhe forcimi i lekut është i lidhur me hyrjet e të ardhurave që kemi pasur gjatë këtij viti. Po ashtu, investimet e huaja direkte janë rritur në neto dhe kjo ka qenë një tjetër arsye. Flukset hyrëse kanë qenë në rritje nga turizmi, remitancat dhe investimet e huaja”, u shpreh Ibrahimaj.
Por Jorida Tabaku ka dy arsye të tjera. “Rekordi i zhvlerësimit të euros është si pasojë e pazarit politik me blerje votash dhe paranë e pistë që kontribuon sot sa tek betoni por më shumë tek fushata” shkruan deputetja demokrate.
