Kryetari i Partisë së Lirisë, Ilir Meta akuzoi sot se më shumë se gjysma e buxhetit të bashkisë Tiranë që drejtohet nga Erion Veliaj shkon për pagat e punonjësve të një administrate që është fryrë dhe deklaratat e VIP-ave, që kanë dalë në krah të tij. E fundit ishte Rita Ora.
“Të gjitha paratë shkojnë për propagandë dhe për deklarata VIP-ash. Tani është koha të flasin qytetarët dhe është koha të ndëshkojmë edhe VIP-at që flasin në këmbim të përfitimeve që marrin nga kryetari i komanduar”, tha Ilir Meta.
Ish-presidenti u pyet edhe për faktin nëse i trembet vjedhjes së votave duke qenë se në gjysmën e Shqipërisë nuk do të kenë numërues.
“Absolutisht kjo është histori që nuk ka më vlerë. Ky është një proces që e ka marrë në dorë populli, do të votojë, pavarësisht përpjekjeve për të dekurajuar.
Të gjithë do të jemi atje, te qendrat e votimit, deri kur të numërohet edhe vota e fundit. Këto janë procese që i kalojnë të kaluarës kur Rama fiksonte rezultatet” tha ai.
Fushatën e rivalit socialist e cilësoi milionere. “Postera pa fund. Miliona euro janë hedhur në të gjithë Shqipërinë për një kandidat që nuk ekziston. Më thoni në cilën fletë votimi është Edi Rama?” tha Meta.
