Prej 73 vitesh Shqipëria ka një institucion për përgatitjen e qenve të shërbimit. Instituti i Përgatitjes së Qenve të Policisë rikthehet në vëmendje sa herë duhet ndihma e tyre. Në rastin e tragjedisë së tërmetit të 26 Nëntorit të 2019 kishim më shumë nevojë se kurrë.
Rroftë Instituti, se qen nuk kishte. Ishte Kosova që na ndihmoi për të gjetur të mbijetuarit. Kjo çështje është rikthyer sërish në media. Shkak është bërë zhdukja e Leonard Theodhorit të njohur si “Koçole” dhe Fatmir Krasniqiy (Sulovari).
Fati i dy 46-vjeçarëve është ende mister. Policia ushtroi disa kontrolle në jug të vendit disa ditë më parë, por pa rezultat. Dyshimet janë se janë vrarë dhe groposur. Prova nuk ka. Për të ndihmuar hetimin nevojitet kërkimi me qen të stërvitur për këtë punë.
Por në media qarkulloi lajmi se policia nuk paska dhe ka kërkuar sërish ndihmën e Kosvoës. Pak vite shtet dhe Kosova ka arritur që të ngrejë këtë strukturë, kurse Shqipëria numëron dekada dhe pa asnjë rezultat.
Vitin e kaluar Instituti nxori në shtije 19 qen të moshave të ndryshme që kanë dalë në pension si dhe një pjesë e tyre që nuk marrin testimet dhe provat për të vazhduar misionin në polici. Megjithatë Instituti nuk është mbyllur, por vazhdon punën.
Por çfarë bëhet me këtë institut dhe ku shkojnë fondet? “5Pyetjet.al” bëri një kërkim të thjeshtë në faqen e prokurimeve publike ku rezulton se në vitin e fundit ky institucion, Instituti i Përgatitjes së Qenve të Policisë ka bërë shtatë tendera, pesë për goma e riparime makinash dhe vetëm dy për qentë, blerje ushqimi dhe ilaçe kundër tërbimit.
Tenderat janë firmosur vitin e kaluar dhe këtë vit nga Besnik Kongjonaj dhe shefi aktual i Institutit të Përgatitjes së Qenve të Policisë, kryekomisar Besnik ZELA. Si përfundim tenderat janë bërë, qenë sipas procedurave rezulton se paska sepse u bleu ushqimi, por në fund ndihmë i kërkojmë Kosovës.
