Rusia ka lëshuar urdhërarrest për prokurorin e Gjykatës Penale Ndërkombëtare, i cili në mars nënshkroi urdhërarrestin për presidentin Vladimir Putin për krime lufte të kryera në agresionin kundër Ukrainës, njoftuan të premten mediat ruse.
Gjyqtari britanik Karim Ahmad Khan i është shtuar listës së personave në kërkim të Ministrisë së Punëve të Brendshme ruse. Moska hapi procedimet kundër Ahmad Khanit dhe tre gjyqtarëve të tjerë të GJNP-së më 20 mars, menjëherë pasi GJNP-ja lëshoi urdhërarrest për Putinin.
Në urdhrin e parë të arrestit për agresion kundër Ukrainës, GJNP-ja bëri thirrje për arrestimin e Putinit me dyshimin se ishte përgjegjës për dëbimin e paligjshëm të fëmijëve dhe transferimin e paligjshëm të njerëzve nga territori i Ukrainës në Federatën Ruse.
Sipas të njëjtave akuza, GJNP-ja lëshoi gjithashtu urdhërarrest për Maria Alekseevna Lvova-Belova, komisioneren ruse për të Drejtat e Fëmijëve.
Si autoritetet ruse ashtu edhe Putini hedhin poshtë të gjitha akuzat për krime në pushtimin e Ukrainës, të cilin ata e quajnë një operacion ushtarak special, dhe pretendojnë se Rusia është viktimë e agresionit perëndimor dhe gënjeshtrave perëndimore.
