Një ditë pas zgjedhjeve të 14 Majit kur të gjithë, i madh dhe i vogël i kishin sytë tek kutitë me rezultatin e votimit, Albcontrol, e cila është agjencia që menaxhon dhe kontrollon hapësirën ajrore shqiptare ka dhënë një tender 550 milionë lekë pa garë.
Procedura e prokurimit lidhet me sigurimin e kullës së kontrollit mobile në Aeroportin e Kukësit me gjithë pajisjet e nevojshme. Tenderi u hap me 30 mars, u mbyll në 2 maj dhe të hënën që lamë fituesi doli nga zarfi.
Në garë ishte vetëm kompania “R & T” në pronësi të Renis Tërshanës, e cila ofroi të njëjtën shumë që kishte vendosur në dispozicion Albcontrol, 55 497 600,00 lekë.
Faqja që monitoron procedurat e prokurimeve e ka kapur të dyshimtë duke ngritur flamurin e kuq për shkak se ishte një tender pa garë. Vetëm një ofertues, i cili dha të njëjtën shumë dhe në fund mori tenderin.
Shefja e Albcontrol Laureta Omeri nuk ka firmosur vetë, por ia ka deleguar njërit prej drejtorëve, Dritan Isaku.
