“The Sun” shkruan se 11 shqiptarë të dënuar për vrasjen në Britani do të ekstradohen për të vuajtur dënimet në atdhe. Mes tyre është edhe Koci Selamaj, i dënuar me 36 vjet burg për vrasjen e mësueses Sabina në Greenwich, Londra Juglindore, në shtator 2021.
“Burgjet britanike strehojnë më shumë se 1,330 shqiptarë – grupi më i madh i kombësisë së huaj pas hekurave. Ministrat janë të vendosur të ulin faturën për mbajtjen e tyre, e cila është rritur në rreth 60 milionë paund në vit.
Një marrëveshje që përshpejton largimin e të burgosurve do të nënshkruhet brenda disa javësh pasi zyrtarët e Ministrisë së Drejtësisë dhe Shërbimit të Burgjeve të Mbretërisë së Bashkuar vizituan Shqipërinë në mars” shkruhet në artikull.
Më tej, shkrimi vazhdon duke theksuar se “transferimet e shpejta të të burgosurve do të bëhen në këmbim të modernizimit të burgjeve dhe sigurimit të një flote automjetesh burgu”.
“The Sun” thotë se një burim nga shërbimi i burgjeve të Shqipërisë tha se “Ekipi i Mbretërisë së Bashkuar vizitoi të gjitha burgjet tona në Peqin, Lezhë, Fushë Krujë dhe Drenovë në qytetin e Korçës.
Ata kishin një urdhër të qartë nga ministri i tyre në MB për të na ndihmuar pa vonesë. Ata do të na ndihmojnë të modernizojmë menaxhimin e burgjeve dhe të përmirësojmë sigurinë dhe logjistikën” mbyllet shkrimi.
