Zyrtare! Kuvendi miraton rritjen e pagave për administratën, ministrat dhe deputetët

Kuvendi miratoi sot tre projektligjet për reformën e pagave në institucionet kushtetuese dhe administratën publike. Mes debateve të shumta mes shumicës dhe opozitës në fund, projektligji kaloi me votat e socialistëve dhe një pjesë të PD-së zyrtare, pasi grupimi i Sali Berishës doli hapur kundër.

Ligji për rritjen e pagave të funksionarëve të lartë, si deputetët, ministrat dhe Presidenti, u miratua me 95 vota pro, 3 kundër, asnjë abstenim dhe 5 nuk morën pjesë në votim. Deputetët që votuan kundër ishin Dashnor Sula, Bujar Leskaj dhe Petrit Doda.

Projektligji për rritjen e pagës minimale është miratuar me 97 deputet pro, 0 abstenim, 2 kundër dhe 5 nuk kanë votuar. Ndryshimet në ligjin për “statusin e gjyqtarëve dhe prokurorëve”, kërkonin shumicë të cilësuar prej 84 votash. Në fund kaloi me 93 vota pro duke u rritur pagat edhe gjyqtarëve dhe prokurorëve.

Projektligji u miratua me shpejtësi me qëllim që të dekretohej sot në datë 25 Maj, pasi pasdite presidenti Bajram Begaj niset për në Itali në një vizitë dy ditore.