Qytetarët turq janë drejtuar sot për të dytën herë pas 14 ditësh drejt qendrave të votimit, në një nga votimet më kritike të viteve të fundit, për të zgjedhur presidentin e ardhshëm që do të mbajë në dorë fatin e vendit fqinj për pesë vitet e ardhshme.
Që nga ora 07:00 janë hapur qendrat e votimit ku votuesve u kërkohet të zgjedhin midis dy emrave për të zgjedhurin e tyre: Tayyip Erdogan ose Kemal Kilicdaroglu.
Qendrat e votimit do të mbyllen në orën 17:00 dhe numërimi i votave do të fillojë menjëherë, ndërsa në një kohë relativisht të shkurtër pritet shpallja e rezultateve përfundimtare nga Ministria e Brendshme turke.
Për zgjedhjen e presidentit të 13-të të Turqisë, i cili do të shërbejë një mandat pesë-vjeçar, rreth 61 milionë votues do të votojnë në 191,884 qendra votimi.
Sipas rezultateve përfundimtare të raundit të parë të 14 majit, numri i votuesve të regjistruar në vend ishte 60.721.745.
Kryetari i Këshillit të Lartë Zgjedhor (YSK), Ahmet Gener njoftoi gjithashtu se sot në raundin e dytë të zgjedhjeve do të marrin pjesë 47.523 votues të rinj që mbushën 18 vjeç.
Kështu, numri i zgjedhësve që do të mund të votojnë në vend deri në orën 17 do të arrijë në 60.769.268.
Vlen të theksohet se pjesëmarrja e emigrantëve turq ishte e lartë deri të martën kur u mbyllën qendrat e votimit – 1.9 milionë kundrejt 1.69 milionë në raundin e parë. Sondazhet treguan se ata votuan për ultra-nacionalistët.
