Agjencia e Mbikëqyrjes Policore ka arrestuar në flagrancë 2 punonjës policie në Tiranë, të dyshuar për korrupsion pasi i morën 100 Euro një shoferi.
Të arrestuarit janë:
– Inspektor Andi Çelmeta 36 vjeç, me detyrë Patrullë e Përgjithshme në Sektorin e Forcës së Posaçme “Shqiponja”, pranë Drejtorisë Vendore të Policisë Tiranë;
– Inspektor, Hashim Xhixha 26 vjeç, me detyrë Patrullë e Përgjithshme në Sektorin e Forcës së Posaçme “Shqiponja”, pranë Drejtorisë Vendore të Policisë Tiranë.
Hetimet
“AMP” thotë se arrestimi u krye pasi këta punonjës policie u kapën në flagrancë duke i marrë një drejtuesi mjeti 100 euro, me qëllim shmangien e ndëshkimit të tij me masë gjobe për shkelje të rregullave të qarkullimit rrugor.
Në fakt ishte një kurth që u është ngritur policëve nga një agjent i infiltruar pas denoncimeve që kishte për korrupsion.
Gjatë kontrollit personal, këtyre punonjësve iu gjetën dhe sekuestruan në cilësinë e provës materiale shuma prej 1420 euro, 8800 lekë, si edhe 4 aparate telefonike celularë.
